Festinha da Regueifa en Compostela

O vindeiro 17 de abril, ás 18:00, na Libraría Aenea, celebrarase a Festinha da Regueifa, um encontro de nenos e nenas a fazer festa da poesia cantada e improvisada.
A regueifa é um jogo, um espectáculo, umha forma de expressom persoal e coletiva... e um motivo para reunir numha festa as crianças regueifeiras e siareiras do repentismo numha festa organizada por elas mesmas, de forma autogestionada.
Na Festinha participarán nenos e nenas de 4 a 10 anos do obradoiro de regueifa da Escola Semente, de vários colégios de Compostela, que se reúnem semanalmente no CS A Gentalha do Pichel.
Junto ás regueifeiras da Semente, regueifarám Lúa e Nora, de 10 e 7 anos, duas regueifeiras galego-irlandesas que improvisarám com melodias da Galiza e da Irlanda. Lúa vem de ganhar dous prêmios no certame “O Talentiño”, regueifando no Teatro Xofre de Ferrol, junto a Loaira de Naróm.
Na Festinha da Regueifa tamém participará Ailalá, a ursa pardo do Courel, e mais Maré a Muda, umha das integrantes do grupo de regueifeiras adolescentes “Regueifa Tour”, colectivo que já actuou em festivais da Galiza como Pardinhas ou Salvaterra, e noutros festivais em Portugal, Catalunya ou Euskal Herria.
A regueifa é a forma tradicional galega de cantar improvisando. Nos últimos anos está a viver um processo de revitalizaçom impulsado pola infáncia e a mocidade. Um jogo, umha festa, umha forma de expressom, umha ferramenta para a mudança social, um instrumento de socializaçom em galego... e, na Festinha da Regueifa, a regueifa é um motivo para que as crianças de Compostela e comarca se reúnam para goçar, surprender-se e cantar com alegria e muitas surpresas.